Приведени директори и вработени во Национални шуми, одземени камиони и конфискувано дрво вредно 30.000 евра: „Правдата важи за сите“

Заменик-директорот на ЈП „Национални шуми“, Кире Михаилов, информира дека во изминатите денови биле приведени директорот на подружницата „Бор“ во Прилеп и вработена во подружницата „Бабуна“ во Велес, поради сомнежи за злоупотреба на службената положба.

— реклама —

Во објава на социјалните мрежи, Михаилов посочува дека, според информациите од Министерството за внатрешни работи, постојат сериозни докази и индиции дека приведените се огрешиле пред законот.

— реклама —

Тој информира и дека пред неколку дена била поднесена кривична пријава против вработен во подружницата во Свети Николе, кој, како што наведува, бил директор во времето на претходната владејачка гарнитура на СДСМ и ДУИ, како и против правно лице од Бузалково. Според Михаилов, пријавата се однесува на штета проценета на повеќе од 50.000 евра.

Дополнително, во изминатите седум дена биле одземени неколку камиони поврзани со лица што Михаилов ги нарекува „тендераши и дрвокрадци“. Тој наведува и дека од правно лице во Скопје биле конфискувани околу 400 кубни метри огревно дрво, со проценета вредност од околу 30.000 евра.

— реклама —

„Не знам кој и колку ме верува и разбира кога велам дека правдата важи за сите и дека нема големи и мали, наши и ваши. Едноставно е, секој кој се огрешил пред Законот ќе одговара!“, порачува Михаилов.

Објавата ја завршува со пораката: „Заврши времето КАКО ДО СЕГА...“