Пожарот што избувна од преспанската страна на Пелистер и се движи кон Националниот парк „Пелистер“ и понатаму е најтежок и најкомплексен за гасење во земјава, информираше директорот на Дирекцијата за заштита и спасување, Стојанче Ангелов.
Во гаснењето на пожарот се вклучени копнени сили, механизација, ер-трактори на ДЗС и армиски хеликоптер. Во текот на утрото хеликоптерот со прецизно фрлање вода успеал да изгасне неколку критични точки, но со затоплувањето повторно се активирале горливи точки и чад се појавил на повеќе позиции.
На терен дејствуваат пожарникари од Битола и Ресен, огнени тимови на ДЗС, доброволни пожарникари и механизација. Со булдожери е направена и противпожарна пресека над боровите со цел да се спречи понатамошното ширење на огнената линија.
Ангелов информираше и за повредата на лице ангажирано во гаснењето на пожарот. Станува збор за возач на булдожер, а не за пожарникар.
„Возачот при скок од булдожерот ги повредил ребрата. Според информациите, најверојатно станува збор за напукнати ребра, но нема скршени ребра. Тој е згрижен во болница и се чувствува добро“, вели Ангелов.
Ангелов нагласи дека станува збор за недоразбирање во информациите што се појавиле во јавноста и категорично демантираше дека има повредени пожарникари.
