Пожарот што два дена гори во подножјето на Пелистер од преспинската страна е ставен под целосна контрола, информира директорот на Дирекцијата за заштита и спасување (ДЗС) Стојанче Ангелов. Тој посочи дека во текот на вчерашниот ден биле регистрирани повеќе од 23 пожари на отворен простор, од кои седум и утрово се активни.
Според Ангелов, пожарот кај Пелистер е меѓу најтешките шумски пожари во оваа сезона. Огнената линија што вчера попладне ја надминала противпожарната пресека била запрена во текот на ноќта и утрово.
На терен се ангажирани пожарникари од Ресен и Битола, тимови на Дирекцијата за заштита и спасување со пет „пинцгауери“, како и доброволни пожарникари. Во гаснењето денес ќе се вклучат и екипи на „Национални шуми“.
Рано утрово во акцијата се вклучил и армиски хеликоптер со ведро со капацитет од три тони, а по неговото дејствување се очекува интервенција и со два „ертрактори“ на ДЗС, како и со полициски хеликоптер доколку има потреба.
„Нашата цел е, доколку не успееме да го изгаснеме, барем да го спречиме неговото движење и да не дозволиме да навлезе во квалитетната шума во Националниот парк ‘Пелистер’“, рече Ангелов.
Вториот комплексен пожар е во атарот на селото Градец во Општина Врапчиште, каде што е зафатена борова шума на тешко пристапен терен. Во гаснењето е ангажиран полициски хеликоптер кој се снабдува со вода од блиско езеро и на неколку минути врши налети врз огнената линија.
На терен се и пожарникарите од Гостивар, а според потребите ќе бидат испратени дополнителни сили.
Ангелов посочи дека има уште неколку активни пожари кои зафаќаат поголеми површини, но во моментов не се алармантни и не претставуваат опасност за населените места или за квалитетни борови и други зимзелени шуми.
Тој упати и апел до граѓаните да бидат особено внимателни, бидејќи опасноста од пожари и во септември останува на исклучително високо ниво.
Според Ангелов, податоците за сувоста на вегетацијата покажуваат дека ризикот од пожари и натаму е многу висок на целата територија на државата. Дождовите во источните делови на земјата привремено ја намалиле опасноста, но сувоста на вегетацијата брзо се вратила на претходното ниво.
