Пожарот на Скопска Црна Гора најкомплексен за гаснење, вклучен и полициски хеликоптер

Високите температури и силниот ветер придонесоа вчера да биде еден од најтешките денови во оваа сезона на пожари, со повеќе од 40 пожари на отворен простор низ државата, информира директорот на Дирекцијата за заштита и спасување, Стојанче Ангелов.

Според Ангелов, повеќе од 30 пожари биле изгаснати, додека четири биле активни во моментот на неговото обраќање.

— реклама —

Пожарот што неколку дена беше активен на македонско-косовската граница е целосно изгаснат. Ангелов информираше дека во моментот нема горење ниту од македонска ниту од косовска страна, па не се очекува тој да предизвикува загадување на воздухот.

Пожарот во атарот на селото Милетин, во Општина Брвеница, кој претходно бил ставен под целосна контрола, повторно се активирал во текот на ноќта. Пожарникари и Огнениот тим на Дирекцијата за заштита и спасување работеле на теренот во текот на ноќта, а во раните утрински часови пожарот повторно бил ставен под целосна контрола, а најверојатно и целосно изгаснат. Сепак, ќе биде внимателно следен поради можноста за повторно активирање при пораст на температурите.

— реклама —

Пожарот што вчера избувнал во атарот на селото Ругинце, во Општина Старо Нагоричане, бил целосно изгаснат во раните утрински часови. Ангелов изрази благодарност до пожарникарите од Старо Нагоричане и Ранковце, кои во текот на ноќта работеле на гаснењето на огнот на голема површина.

Како најкомплексен за гаснење во моментот го посочи пожарот во местноста Рамно на Скопска Црна Гора. Во неговото гаснење утрово бил вклучен полициски хеликоптер како поддршка на скопските пожарникари и Огнените тимови на Дирекцијата за заштита и спасување. Активирани биле и неколку тимови од „Национални шуми“, а за заштита на објектот на врвот Рамно биле ангажирани и 30 припадници на Армијата.

Активен е и пожарот во атарот на селото Белица, во Општина Македонски Брод. Иако во текот на ноќта немало сериозни знаци на горење, постои опасност тој повторно да се активира во потоплиот дел од денот. На терен се пожарникарите од Македонски Брод, а пожарот се шири на тешко пристапен, а на одредени места и целосно непристапен терен.

— реклама —

Пожарот кој неколку дена е активен во атарите на селата Селци и Локов, во Струшко, во текот на ноќта бил значително намален, но утрово повторно покажал знаци на горење. Поради тоа се ангажирани пожарникарите од Општина Струга, а доколку има потреба, ќе биде испратено и летало.

Пожарот во атарот на селото Тајмиште, во Кичевско, кој бил активен неколку дена, е ставен под целосна контрола.

Ангелов предупреди дека поради високите температури во текот на денот постои опасност од повторно активирање на постојните, но и од појава на нови пожари на отворен простор.

„Повторно апелирам до сите граѓани да бидат исклучително внимателни, бидејќи доволна е само искра за вистинска катастрофа“, порача Ангелов.