Пожар што претпладнево избувнал над православните гробишта во Тетово претставувал сериозна опасност по околните куќи и населението, но бил ставен под целосна контрола благодарение на брзата интервенција на пожарникарите и полицискиот хеликоптер.
Пожарот избувнал околу 11 часот меѓу неколку куќи, по што огнот се проширил кон блиската шума во насока на тетовското кале. Во гаснењето интервенирале тетовските пожарникари, а полицискиот хеликоптер во девет наврати фрлал вода врз огнените јазици.
Директорот на Дирекцијата за заштита и спасување (ДЗС), Стојанче Ангелов оцени дека била избегната поголема опасност поради близината на голем број куќи и населението.
„Избегната е голема катастрофа. Овој пожар имал потенцијал да направи голема беља затоа што наоколу има многу куќи, а и многу населени, од она што можам да го видам“, изјави Ангелов.
Според изјава на жител од околните куќи, пожарот избувнал за време на детска игра, кога наеднаш се појавила искра, по што огнот брзо се проширил и зафатил сунѓери во близина.
Засега нема информации за повредени лица или зафатени куќи, а пожарот е ставен под целосна контрола.
