Би-Би-Си побара од федералниот суд во Флорида да издаде судски покани за тројца членови на семејството на Доналд Трамп, како дел од својата правна одбрана во тужбата што американскиот претседател ја поднесе против британскиот јавен сервис, барајќи отштета од 10 милијарди долари.
Правниот тим на Би-Би-Си побара Доналд Трамп Јуниор, Иванка Трамп и Џаред Кушнер да сведочат и да достават документи поврзани со настаните од 6 јануари 2021 година, кога приврзаници на Трамп упаднаа во американскиот Конгрес.
Од Би-Би-Си наведуваат дека тројцата имаат лични сознанија и веројатно поседуваат документи релевантни за повеќе точки од тужбата што Трамп ја поднесе против медиумската куќа.
Тужбата на Трамп се однесува на документарецот „Панорама“ од 2024 година, во кој биле споени два дела од неговиот говор одржан непосредно пред упадот во Конгресот. Правниот тим на Трамп тврди дека со монтажата намерно бил создаден погрешен впечаток дека тој директно повикувал на насилство.
Би-Би-Си претходно јавно се извини за монтажата, признавајќи дека видеото создало „погрешен впечаток дека претседателот Трамп директно повикал на насилство“. Сепак, медиумската куќа и понатаму смета дека спорниот прилог не претставува основа за тужба за клевета.
Од тимот на Трамп го обвинија Би-Би-Си дека преку судската постапка се обидува да го вознемирува претседателот, неговото семејство и неговите приврзаници.
Во најновото барање, Би-Би-Си посочува дека членовите на семејството на Трамп можат да бидат важни сведоци за неговите постапки на 6 јануари. Според документите на кои се повикува медиумската куќа, Иванка Трамп и Доналд Трамп Јуниор биле во Овалната соба додека претседателот го подготвувал својот говор, додека Кушнер учествувал во подготовката на изјавата со која подоцна било осудено насилството.
Би-Би-Си уште во мај се обидел да им ги достави судските покани на Иванка Трамп и Џаред Кушнер во нивниот дом во Флорида, но обидот бил спречен. Одделно, претставник на медиумската куќа се обидел да му достави покана на Доналд Трамп Јуниор во „Трамп тауер“ во Њујорк, но ниту тој обид не бил успешен.
Судот сега треба да одлучи дали ќе ги одобри поканите, а адвокатите на Трамп добиле рок да одговорат на барањето.
