Правосудниот испит ја разгоре политичката расправија: ЗНАМ се заканува со напуштање на Владата, албанските партии му порачаа на Димитриевски дека Врање е блиску

Спорот околу полагањето на правосудниот испит предизвика остри реакции во албанскиот политички блок, откако ЗНАМ порача дека испитот треба да се полага исклучиво на македонски јазик и дека партијата ќе ја напушти Владата доколку биде прифатен предлогот на министерот за правда Јетон Шасивари за комбинирано полагање.

Лидерот на ЗНАМ, Максим Димитриевски, се соочи со критики од повеќе албански политичари, кои реагираа на неговите изјави за застапеноста на Албанците и употребата на албанскиот јазик. Меѓу пораките упатени до него беа и „Врање е блиску“, како и обвинувања за шовинистички изјави.

— реклама —

Пратеникот на Алијанса за Албанците, Ријад Шаќири, порача дека Албанците не се гости во Македонија и дека албанскиот јазик не е привилегија, туку право. Пратеничката Илире Даути, пак, реагираше на квалификацијата „мала група граѓани“, посочувајќи дека Албанците сочинуваат 29,5 проценти од населението, а Македонците, 54,2 проценти. Таа го повика Димитриевски да биде внимателен кога зборува за Албанците и за албанскиот јазик.

Реакција пристигна и од претставниците на НАИ, кои најавија бојкот на свечената седница по повод Денот на Куманово поради изјавите на градоначалникот Димитриевски. Тие оценија дека не можат да учествуваат во настани на кои, според нив, не се почитуваат Албанците, нивниот јазик и рамноправноста во мултиетничкиот град.

— реклама —

Пратеникот на владејачката Вреди, Аднан Азизи, исто така го критикуваше ставот на ЗНАМ, тврдејќи дека правосудниот испит ќе се полага и на албански јазик, без оглед на противењето на партијата. Тој потсети и на разрешувањето на поранешниот министер за правда Игор Филков.

— реклама —

Од друга страна, Димитриевски и Филков останаа на ставот дека правосудниот испит треба да се полага само на македонски јазик. Димитриевски најави дека ЗНАМ ќе ја напушти Владата доколку биде прифатен предлогот на Шасивари, додека Филков оцени дека Уставот и законите не дозволуваат полагање на испитот на друг јазик. Предлогот за комбинирано полагање го нарече „хибридно решение“.

Димитриевски најави и дека на следната средба со премиерот Христијан Мицкоски ќе побара лидерска средба со коалициските партнери, на која би се утврдиле црвените линии и последиците од различните ставови за ова прашање.

— реклама —

Опозицискиот СДСМ, пак, оцени дека темата се користи за создавање впечаток за судир во владејачката коалиција, со цел да му се обезбеди алиби на Мицкоски за распишување предвремени парламентарни избори.

Министерот Шасивари предложи теоретскиот дел од правосудниот испит, кој опфаќа 12 предмети, да се полага на албански јазик, а практичниот дел, составен од два испита, на македонски. Предлогот го поддржа премиерот Мицкоски, но студентите Албанци го отфрлија.