„Правото не е етнички договор“ – професорот Кекеновски за барањето правосуден да се полага на албански

Професорот по право Јове Кекеновски оцени дека барањето правосудниот испит да се полага на друг јазик не претставува прашање на јазични права, туку политички инструментализирана тема што, според него, е спротивна на уставниот поредок и правната сигурност.

— реклама —

Тој посочува дека Уставот јасно го утврдува македонскиот како службен јазик, додека употребата на другите јазици се однесува на институционална комуникација, а не на професионални критериуми за влез во правосудниот систем.

— реклама —

Според Кекеновски, Законот за употреба на јазиците ги уредува правата на граѓаните во постапките, но не ги дефинира условите под кои некој станува судија или обвинител.

Тој нагласува дека правосудниот испит е филтер на знаење, правна логика и терминолошка прецизност, при што јазикот не е само средство за комуникација, туку основен инструмент за примена на правото.

— реклама —

„Судија или обвинител мора да го владее на највисоко ниво јазикот на кој се создава и применува правниот поредок. Тоа не е прашање на дискриминација, туку на компетентност“, наведува Кекеновски.

— реклама —

Професорот додава дека ваквата практика е стандард и во други држави, каде правосудните испити се полагаат на службениот јазик, оценувајќи дека правдата не смее да биде предмет на политички компромиси.