Опозициската СДСМ обвини дека Владата предводена од Христијан Мицкоски задоцнила со економските мерки, поради што, како што велат, граѓаните веќе ја платиле цената преку раст на цените и пад на животниот стандард.
Од партијата наведуваат дека во изминатиот период значително поскапеле основните прехранбени производи, како и горивата, што дополнително ги зголемило трошоците за живот.
„Цел месец помина, цените поскапеа, животниот стандард драматично опадна. Празни џебови и празни фрижидери, тоа е реалноста денеска“, соопштуваат од СДСМ.
Партијата оценува дека дел од мерките кои сега се разгледуваат се всушност предлози кои претходно ги понудиле тие, но, според нив, биле прифатени со задоцнување.
Воедно, СДСМ предлага сет економски мерки, меѓу кои укинување на ДДВ за основни прехранбени производи, намалување на ДДВ за горивата на 5 проценти, намалување на акцизите, поевтинување на патарините и зголемување на државните резерви на нафта.
Од партијата сметаат дека ваквите чекори треба итно да се преземат за да се ублажи ценовниот притисок врз граѓаните.
