Пред да го кажат судбоносното „да“, младенци во Пирот отидоа на гласање: „Прво да победиме овде, па во животот“

Утрово во 7 часот беа отворени избирачките места во Србија за предвремените парламентарни избори. На бројни избирачки места редици почнаа да се формираат уште пред отворањето, а гласачи чекаат и во странство.

Несекојдневна сцена била забележана на избирачкото место број 6 во населбата Барје, во Пирот, каде што Мина и Марко одлучиле да гласаат непосредно пред венчавката.

— реклама —

„Прво треба да ја исполниме граѓанската должност“, порачале младенците, кои го искористиле своето избирачко право пред да го кажат судбоносното „да“, пишува Plusonline.rs.

„Заедно одлучивме прво да победиме овде, а потоа и во животот. Сè се совпадна токму на денешен ден, така што секаде ќе бидеме победници. Ова е нов почеток и за земјата и за нас“, изјавила Мина.

— реклама —

Марко додал дека нивното доаѓање на избирачкото место испраќа порака до сите што мислат дека имаат поважни обврски од гласањето.

„Ова е порака до сите што велат дека немаат време или дека денес имаат поважни обврски од гласањето“, рекол тој.

— реклама —

Граѓаните на Србија денеска на предвремените парламентарни избори го избираат новиот состав на Народното собрание. Право на глас имаат 6.451.292 избирачи.

На изборите учествуваат 18 изборни листи со вкупно 2.418 кандидати за 250 пратенички места. Вкупно 8.392 избирачки места се отворени од 7 до 20 часот.

Се гласа на избирачкото место на кое гласачот е запишан во избирачкиот список, а за идентификација е потребна важечка лична карта или пасош.

Изборниот молк трае до затворањето на избирачките места, а првите неофицијални резултати се очекуваат до 22 часот.