Од ВМРО-ДПМНЕ реагираат преку соопштение на критиките од СДСМ во врска со уметничката инсталација при одбележувањето на независноста, обвинувајќи ја опозициската партија дека го користи случајот за ширење, како што велат, омраза и дефетизам.
Од партијата наведуваат дека СДСМ целосно се оддалечил од политиките со кои некогаш се претставувал како државотворна партија. Според нив, лицемерно е што СДСМ сега реагира за приказот на знамето во уметничката инсталација, бидејќи во минатото и самиот повеќепати користел погрешно знаме на свои партиски настани.
Од ВМРО-ДПМНЕ обвинуваат дека Филипче и СДСМ се против одбележувањето на независноста и дека, според нив, не им се допаѓа што Македонија е во центарот на прославата.
Во реакцијата се обвинува поранешната власт и за промената на името на државата, како и за носењето на францускиот предлог, за кој од ВМРО-ДПМНЕ велат дека ја закочил државата и ја оптоварил иднината на граѓаните.
„Филипче и СДС се против прославата за независност и не им се допаѓа што таму ја има Македонија“, наведуваат од ВМРО-ДПМНЕ.
Од партијата тврдат и дека СДСМ шири дефетизам, дека се радува на потешкотиите во државата и дека ги потценува нејзините успеси.
„Затоа Филипче ја промашува Македонија. Всушност, тој и Заев ја мразат и на нејзин грб сакаат само да печалат“, се наведува во реакцијата на ВМРО-ДПМНЕ.
