Повеќе скопски населби, институции и деловни објекти денеска ќе останат без вода поради технички зафати на водоводната мрежа што ги спроведува ЈП „Водовод и канализација“ – Скопје.
Според информациите од Регионалниот центар за управување со кризи – Скопје, интервенциите се изведуваат поради дефект на затворачи на водоводна линија на булеварот „Крсте Мисирков“ и Кеј „Димитар Влахов“.
Прекинот на водоснабдувањето е предвиден во периодот од 9 до 22 часот.
Без вода ќе бидат објектите на Македонската академија на науките и уметностите, Основниот суд 2, Младинскиот културен центар, Универзитетската библиотека, Универзитетот „Свети Кирил и Методиј“, Трговскиот центар „Мавровка“, дел од Старата скопска чаршија, Саат-кулата, Македонската телевизија, како и улиците „Петар Ѓорѓиев“, „Отокар Кершовани“ и „Адвокатска“.
Прекин на водоснабдувањето ќе има и на дел од булеварот „Крсте Мисирков“ и во населбата Крњево.
Во населбата Автокоманда, од ниската зона до Камник, се очекува намален притисок на водата или можни повремени прекини во водоснабдувањето.
Од надлежните служби апелираат граѓаните навреме да обезбедат потребни количини вода додека траат интервенциите на водоводната мрежа.
