Во Скопје ЗОО пристигна подмладок кај белите волци, откако семејството се збогати со две мали волчиња кои веќе го привлекуваат вниманието на вработените и посетителите.
Од Зоолошката градина информираат дека младенчињата сè уште се во најраната фаза од својот развој и најголемиот дел од времето го поминуваат во близина на својата мајка, која внимателно се грижи за нивната безбедност.
„Нашите мали волчиња најчесто се кријат во дупки и засолништа, токму како што тоа природно го прават и во дивината. Првите денови ги минуваат скриени и заштитени, а само повремено излегуваат надвор за кратко да го истражат просторот“, велат од Скопје ЗОО.
Фотографиите што ги објави Зоолошката градина се направени токму во такви ретки моменти, кога младенчињата љубопитно излегуваат од своето засолниште, по што повторно се враќаат во сигурноста покрај мајката.
Новите жители веќе предизвикуваат голем интерес кај љубителите на животните, а од Зоолошката градина најавуваат дека посетителите ќе можат да ги набљудуваат како растат и постепено стануваат сè поактивни во своето живеалиште.
