Управата за финансиска полиција поднесе кривична пријава до Основното јавно обвинителство Скопје против три физички лица – управители и сопственици на едно правно лице, како и против самото правно лице, поради сомнение за сторено кривично дело „даночно затајување“.
Според Финансиската полиција, осомничените во април 2024 година договориле и реализирале продажба на линија за производство на кабли во вредност од 14.514.000 денари, но трансакцијата не ја евидентирале во сметководствената документација на фирмата.
Дел од средствата, во износ од 2.701.189 денари, биле префрлени на лични банкарски сметки и сметки на блиски лица, без да бидат евидентирани. Дополнително, дел од продажбата бил реализиран преку компензација со патничко возило, вредно 1.537.500 денари, и кабли во вредност од 1.516.500 денари, кои исто така не биле евидентирани, ниту биле пронајдени кај правното лице.
Истрагата утврдила и дека управителот, во име на компанијата, не ги отпишал и не ги оданочил неплатените обврски кон домашни и странски добавувачи од 2022 година, во вкупен износ од 17.380.716 денари.
Со овие дејствија, според Финансиската полиција, не биле пресметани, пријавени и уплатени данок на додадена вредност во износ од 272.970 денари, данок на добивка од 3.764.991 денар и персонален данок на доход од 639.401 денар.
Со тоа, Буџетот на Република Македонија бил оштетен за вкупно 4.677.362 денари.
