Пазарот на недвижности во Европската Унија во текот на 2025 година бележи раст на продажбата во поголемиот дел од земјите-членки, додека Хрватска е меѓу ретките држави каде што бројот на реализирани трансакции е намален, покажуваат најновите податоци на Евростат.
Од 18 земји опфатени со анализата, продажбата на станбени недвижности е намалена само во три – Хрватска за 4,1 проценти, Бугарија за 2,5 проценти и Полска за 1,1 процент.
Најголем раст, пак, е регистриран во Словенија, каде што продажбата е зголемена за 29,9 проценти, следена од Литванија со 22,8 проценти и Австрија со 21,4 проценти.
Споредбено со 2024 година, трендот покажува закрепнување на европскиот пазар на недвижности. Тогаш, во однос на 2023 година, пад на продажбата бил забележан во шест земји, а раст во 12.
Во 2024 година најголем пад бил евидентиран во Словенија со 17,7 проценти, Хрватска со 13,9 проценти и Франција со 9,4 проценти. Од друга страна, најголемо зголемување на продажбата имале Луксембург со 47,1 процент, Унгарија со 34,8 проценти и Холандија со 17 проценти.
Од Евростат посочуваат дека статистиката се базира на податоци што земјите-членки доброволно ги доставуваат, а анализата ги опфаќа купопродажбите на нови и постојни станови и куќи што ги купуваат домаќинства.
