Продолжува пошумувањето на Шар Планина: нови 30.000 садници ќе бидат засадени

Обновувањето на шумските површини на Шар Планина продолжува и оваа есен, со засадување нови 30.000 садници на вкупна површина од 12 хектари. Активностите се реализираат во соработка со организацијата PURE PROMISE, која обезбедила донација за подигнување и одгледување на насадите во период од три години.

— реклама —

Во рамките на проектот, пошумувањето ќе се одвива на два локалитета: Ѓермо, на површина од шест хектари, и Сетоле, каде што ќе бидат пошумени две површини од по три хектари.

— реклама —

Предвидено е засадување автохтони шумски видови, меѓу кои ела, смрча, бел бор, бука и јавор. Изборот и распоредувањето на садниците ќе бидат приспособени на природните услови на теренот.

Од Националниот парк „Шар Планина“ информираат дека соработката опфаќа и грижа за насадите по нивното засадување. Во следните две години ќе се спроведуваат редовна нега, следење на здравствената состојба на младите дрвја и дополнително засадување таму каде што ќе биде потребно.

— реклама —

Во рамките на посетата, претставници на паркот и нивните партнери од Холандија ги разгледале површините на кои во моментов се одвива пошумувањето, како и дел од локациите обновени минатата година. Посетата била можност да се оцени развојот на младите насади, да се разменат искуства и да се разговара за идните активности.

— реклама —

Од Националниот парк посочуваат дека пошумувањето е долгорочен процес кој не се сведува само на засадување дрвја, туку опфаќа обновување на оштетените шумски површини, враќање на природната вегетација и создавање услови за развој на здрави и отпорни шуми. Упатена е благодарност до PURE PROMISE и партнерите од Холандија за поддршката и посветеноста на заедничката цел.