Прво систематско пребројување на дивокозата на Шар Планина, забележани здрави стада и подмладок

Националниот парк „Шар Планина“, во соработка со Македонското еколошко друштво (МЕД), ги спроведе првото организирано пребројување и проценката на популацијата на дивокозата во зоната на строга заштита Лешница.

— реклама —

Истражувањето опфати три лешнички долини, каде што биле забележани здрави стада со единки од различна возраст и пол, вклучително и подмладок. Според надлежните, овие показатели упатуваат на добра состојба на популацијата, а на набљудуваните места има и соодветни услови за исхрана.

— реклама —

Резултатите се совпаѓаат со досегашните набљудувања на ренџерската служба и податоците од фотозамките, кои го потврдуваат и присуството на природни предатори во планинскиот екосистем.

Собраните податоци ќе придонесат и за мониторингот на балканскиот рис, кој го спроведува МЕД во соработка со партнери од Македонија и соседните држави. Шар Планина е значајно живеалиште за овој редок вид, но и за дивокозата, на која високопланинските пасишта, карпестите предели и шумите ѝ обезбедуваат соодветни услови за живот.

— реклама —

Од Националниот парк посочуваат дека заштитата на дивокозата не подразбира само следење на нејзиниот број, туку и создавање услови за непречено живеење. Меѓу клучните мерки се спречувањето на криволовот, почитувањето на забраната за лов во паркот и контролата на движењето на моторните возила, бидејќи животните се чувствителни на човечкото вознемирување.

— реклама —

Доколку временските услови дозволат, пребројувањето ќе продолжи и на други места во Националниот парк.