Во судницата во Идризово денеска продолжи судењето за трагичниот пожар во дискотеката „Пулс“ во Кочани, во кој загинаа 63 лица, а околу 200 беа повредени.
Со денешното рочиште продолжи доказната постапка, при што Обвинителството презентираше материјални докази поврзани со работењето на клубот, меѓу кои дозволи, лиценци и елаборати изработени за дискотеката „Пулс“. Според информациите од судницата, документите биле потпишани во присуство на еден од одговорните лица во клубот, Митко Стојанов.
Рочиштето денеска помина во потурбулентна атмосфера од вообичаено, откако обвинетиот Шабан Салиу, поранешен директор на Дирекцијата за заштита и спасување и актуелен министер без ресор, се обидел двапати да паркира на места предвидени за обвинителите и за семејствата на жртвите.
Според информациите од местото на настанот, по расправија со полициските службеници кои го регулирале паркирањето, возилото на крајот било отстрането од неговиот адвокат.
Судењето денеска го следеше и словенечкиот амбасадор во земјава, Грегор Прескер, кој пред неколку недели оствари средба со семејствата на жртвите.
Тој кратко изјавил дека присуствува на процесот бидејќи станува збор за едно од најзначајните судења во јавноста и сакал да види како се одвива постапката.
Доказната постапка продолжува и во наредниот период, а се очекува Обвинителството да презентира дополнителни материјали поврзани со трагедијата.
