Судењето за трагичниот пожар во дискотеката „Пулс“ во Кочани, во кој животот го загубија 63 лица, а над 200 беа повредени, продолжува денеска со изведување на материјални докази во судницата во Идризово.
На претходното рочиште сведочеше директорот на Институтот за судска медицина, Александар Станков, кој истакна дека кај најголем дел од жртвите причината за смртта било труење со јаглероден моноксид. Според него, овој гас брзо се шири во затворен простор и претставува доминантен фактор во вакви пожари, додека водородниот цијанид, пронајден кај дел од жртвите, дополнително го засилил неговото дејство.
Поради недостапност на двајца сведоци, нивните искази дадени во Обвинителството беа прочитани во судницата, што предизвика реакција од одбраната, која посочи дека станува збор за клучни сведоци поврзани со поставувањето на прскалките од кои избувнал пожарот.
Барањето на адвокатката на првообвинетиот Дејан Јованов – Деко за исклучување на јавноста, поради наводни закани, беше одбиено од судот со образложение дека такви закани не се евидентирани.
Во меѓувреме, веќе е донесена и првата неправосилна пресуда поврзана со случајот, при што тројца полицајци добија условни казни. Од Здружението „16 март 2025“ реагираа дека ваквата одлука не претставува вистинска правда, посочувајќи дека за злоупотреба на службената должност законот предвидува и затворски казни до десет години.
