Рускиот генерал-полковник Станислав Петров, поранешен командант на руските сили за радијациска, хемиска и биолошка заштита (РКБО), е пронајден мртов во неговиот стан во Москва, јавуваат странски медиуми, повикувајќи се на првични информации.
Според извештаите, 87-годишниот пензиониран генерал бил пронајден од своите блиски во раните утрински часови на 2 април, во стан во познатата зграда „Куќа на насипот“. Полициски извори за руските медиуми навеле дека покрај телото бил пронајден пиштол, а првичните информации укажуваат дека се работи за самоубиство.
Медицински извори наведуваат дека Петров во последниот период боледувал од тешка болест.
Петров бил една од значајните воени личности во областа на хемиската одбрана и последен командант на советските сили за хемиска заштита до 1992 година, по што продолжил да раководи со новоформираните руски единици за РКБО до 2001 година.
По пензионирањето останал активен во воено-научниот сектор, како главен уредник на стручно списание и истражувач во военонаучен центар при руското Министерство за одбрана.
Смртта на Петров доаѓа во период на засилени меѓународни тензии и обвинувања поврзани со употреба на хемиски агенси во воениот конфликт во Украина, при што дел од институциите за кои работел се под меѓународни санкции.
Случајот е предмет на понатамошна истрага од страна на руските надлежни органи.
