Пронајдени остатоците од медицинскиот авион што исчезна над Атлантикот, по шест лица сè уште се трага

Американската крајбрежна стража пронајде остатоци од медицинскиот авион кој исчезна над Атлантскиот Океан додека летал од Бермуди кон Бостон. Во авионот имало шест лица, а потрагата по нив продолжува.

Остатоците се пронајдени во морето во близина на островот Нантакет, Масачусетс, а американската крајбрежна стража потврди дека припаѓаат на исчезнатиот „Gulfstream G100“. Спасувачките екипи продолжуваат со операцијата во потрага по четворицата членови на екипажот и двајцата патници.

Авионот бил регистриран во Канада и го управувала компанијата „Latitude Air Ambulance“, специјализирана за медицински транспорт. Тој полетал од меѓународниот аеродром „L.F. Wade“ на Бермуди и требало да слета во Бостон.

— реклама —

Четворицата членови на екипажот биле канадски државјани, додека двајцата патници – пациент и член на неговото семејство – биле државјани на Бермуди.

Федералната управа за воздухопловство на САД ја известила крајбрежната стража дека контролата на летање го загубила контактот со авионот во раните утрински часови во саботата.

Податоците од следењето на летот покажуваат дека авионот во поголемиот дел од патувањето летал на височина од околу 7.300 метри, по што започнал нагло да се спушта. За само неколку минути изгубил речиси 4.000 метри височина.

— реклама —

Дополнителни детали за последните моменти од летот се појавија од снимките од комуникацијата меѓу пилотот и контролата на летање.

„Разбрано, рековте дека доаѓате на слепо. Тоа ли го рековте?“, се слуша како контролорот го прашува пилотот.

Одговорот на пилотот не се слуша на снимката. Контролорот подоцна потврдил дека пилотот прогласил вонредна состојба непосредно пред да биде загубен контактот со авионот.

Според информации објавени од американски медиуми, пилотот пријавил и проблеми со електричниот систем додека авионот се приближувал кон областа на Нантакет.

— реклама —

Откако авионот исчезнал од радарите, во потрагата биле вклучени авиони, хеликоптер и бродови на американската крајбрежна стража. По повеќечасовната операција било откриено поле со остатоци и било потврдено дека тие потекнуваат од исчезнатиот авион.

И покрај пронаоѓањето на остатоците, шесте лица што биле во авионот сè уште се водат како исчезнати, а потрагата продолжува.

Премиерот на Бермуди, Дејвид Берт, соопшти дека неговата влада е во контакт со американските власти и со семејствата на лицата кои биле во авионот.

— реклама —

„Се молиме сите шест лица да бидат пронајдени живи и здрави“, порача Берт.

Канадскиот министер за транспорт Стивен Мекинон, исто така, потврди дека четворица канадски државјани биле во авионот и дека канадските власти соработуваат со надлежните институции додека трае операцијата за пребарување и спасување.

Причината за несреќата засега не е утврдена.