Спасувачките тимови во Индонезија успешно ги пронајдоа 11-те европски туристи и еден локален член на екипажот кои исчезнаа откако нивниот глисер потона во близина на островот Сулавеси поради силното невреме. Потрагата сега е насочена кон 29-годишниот капетан, кој сè уште не е пронајден.
Пловилото тргнало рано наутро од нуркачки центар во покраината Централен Сулавеси кон пристаништето Мариса во соседната покраина Горонтало. Спасувачката акција започнала неколку часа подоцна и траела во текот на целата ноќ.
Меѓу патниците имало петмина Холанѓани, тројца Германци, по еден државјанин на Чешка, Белгија и Франција, како и двајца индонезиски членови на екипажот.
Во спасувачката операција се пребарува морска област од околу 300 квадратни наутички милји во заливот Томини, популарна туристичка дестинација. Во акцијата се вклучени дрон со термовизиска камера, нуркачки тимови и спасувачки пловила.
Според сведочењата на спасените, глисерот за време на силното невреме се распаднал на два дела. Туристите успеале да се префрлат на спасувачки сплав, додека капетанот останал на еден од деловите на пловилото, по што му се изгубила трага.
Индонезија, која се состои од повеќе од 17.000 острови, често се соочува со поморски несреќи, главно поради недоволни безбедносни стандарди и преоптоварени пловила. Само на 15 јули, брод со 76 лица потона кај островот Селајар, при што четири лица загинаа, а 14 и понатаму се водат како исчезнати.
