Управата за финансиска полиција до Основното јавно обвинителство Скопје поднесе кривична пријава против странски државјанин со иницијали С.Г.О.Б., во својство на сопственик и управител на правно лице, како и против самото правно лице, поради сомнение за сторено кривично дело „Злоупотреба на постапката за јавен повик, доделување договор за јавна набавка или јавно-приватно партнерство“.
Според Финансиската полиција, пријавениот ги прекршил прописите при реализацијата на проектот „Рехабилитација и проширување на канализационата мрежа во Општина Кичево“, за кој во 2023 година бил склучен договор со Министерството за финансии во рамките на ИПА II програмата за животна средина и климатски акции.
Иако бил должен да обезбеди важечка банкарска гаранција, тој го прикрил стечајот на азербејџанската банка „Муганбанк“, која ја издала гаранцијата, со што не открил дека повеќе не располага со валиден инструмент за обезбедување на договорот.
Воедно, без претходно одобрение од Министерството за финансии и надзорниот орган, ангажирал подизведувачи спротивно на договорните обврски и условите за реализација на проектот. Поради утврдените неправилности, договорот бил раскинат.
Со овие дејствија, според истрагата, била предизвикана штета на Буџетот на Република Северна Македонија во износ од 127.425.036 денари, како и загуба на ИПА средства во вредност од 9.474.132 евра, средства што државата ќе треба да ги обезбеди од сопствени извори.
По целосното постапување на обвинителството, ќе биде утврдена евентуалната кривична одговорност на пријавените лица.
