Просечната нето-плата во Македонија за две години е зголемена за близу 8.000 денари, соопшти денеска на прес-конференцијата пратеникот на ВМРО-ДПМНЕ, Бојан Стојаноски, повикувајќи се на официјалните статистички податоци.
Според Стојаноски, во март 2024 година просечната нето-плата изнесувала 40.496 денари, додека во март 2026 година достигнала 48.433 денари.
„Тоа значи дека за две години просечната нето-плата е зголемена за близу 8.000 денари, односно за 19,6 проценти“, изјави Стојаноски.
Тој посочи дека во истиот период растот на цените изнесувал 7,8 проценти, а по корекцијата со инфлацијата, реалното зголемување на просечната плата достигнува близу 11 проценти.
„Тоа значи дека платите не само што го следат растот на цените, туку растат значително побрзо и реално ја зголемуваат куповната моќ на граѓаните“, истакна Стојаноски.
Пратеникот од ВМРО-ДПМНЕ нагласи дека раст на платите е забележан во сите клучни сектори. Како области со најголем раст во апсолутен износ ги посочи информациите и комуникациите, транспортот и складирањето, како и рударството.
Процентуално, според него, најголем раст е регистриран во транспортот, дејностите поврзани со недвижен имот и образованието.
Стојаноски оцени дека овие показатели се потврда дека економските политики даваат резултати и најави дека цел на Владата останува платите и натаму да растат побрзо од цените, да се отвораат подобро платени работни места и да се подобрува животниот стандард на граѓаните.
