Протестите против Рама се шират низ Албанија, студентите бараат оставка од владата

Протестите против владата на албанскиот премиер Еди Рама продолжуваат во повеќе градови низ Албанија, а во демонстрациите сè повеќе се вклучуваат средношколци и студенти кои бараат оставка од премиерот и неговата влада.

— реклама —

Во Тирана протестите се одржуваат седми ден по ред, додека собири има и во Лежа, Валона, Елбасан и Скадар, пренесува „Јуроњуз Албанија“.

— реклама —

Во Скадар студентите организираа протестен марш и повикаа на бојкот на наставата, извикувајќи пароли против владата и опозицијата. Во Елбасан демонстрациите траат четири дена, а во Лежа средношколци ја бојкотираа наставата и маршираа низ градот. Во Валона, за студентскиот протест беа распоредени полициски сили во близина на ректоратот.

— реклама —

Новите демонстрации следуваат по насилните судири во неделата во Тирана, кога на плоштадот „Скендербег“ и на булеварот „Маченици на нацијата“ дојде до судири меѓу демонстрантите и полицијата. Демонстрантите фрлале камења, стапови, молотови коктели и пиротехнички средства, додека полицијата употребила солзавец за растерување на толпата.

Протестите започнаа со барања поврзани со состојбите во образованието, високите трошоци за студирање и ограничените можности за вработување на младите, но со текот на деновите прераснаа во пошироко антивладино движење со главно барање за оставка на Рама и неговата влада.