Први резултати од истрагата за атентатот врз Трамп: „Можен мотив е војната со Иран“

Американско-израелскиот конфликт со Иран можеби бил еден од мотивите за обидот за атентат врз Доналд Трамп и високи претставници од неговата администрација, се наведува во разузнавачки извештај на Министерството за внатрешна безбедност на САД.

— реклама —

Нападот бил спречен минатиот месец за време на гала-вечера на дописниците од Белата куќа, а извештајот бил доставен до државни и локални полициски агенции, како и до други федерални институции.

Во документот се посочува дека осомничениот Кол Ален имал „низа општествени и политички незадоволства“, а конфликтот со Иран можел да придонесе за неговата одлука да го изведе нападот. Проценката се темели и на негови објави на социјалните мрежи во кои ја критикувал американската политика.

— реклама —

Иако станува збор за прелиминарна анализа, таа претставува најконкретен показател досега дека меѓународните тензии можеби биле фактор во мотивите на напаѓачот.

— реклама —

Американското Министерство за правда во меѓувреме ја прошири обвинителницата против Ален, додавајќи обвинение за напад врз федерален службеник, откако наводно пукал кон агент на Тајната служба на безбедносен контролен пункт.

Претходно тој беше обвинет за обид за атентат, употреба на огнено оружје при извршување насилно кривично дело и нелегален транспорт на оружје преку државни граници. Засега не се изјаснил за вина.

Истражните органи продолжуваат да ги анализираат неговите активности на интернет и објавите на социјалните мрежи, во обид да се утврди точниот мотив за нападот и да се спречи ширење на шпекулации и теории на заговор.