Првите резултати од изборите во Србија се очекуваат во 21:15 часот

Првите прелиминарни резултати од предвремените парламентарни избори во Србија се очекуваат околу 21:15 часот, соопшти вечерва претседателот на Републичката изборна комисија (РИК), Владимир Димитријевиќ, пренесува телевизијата Н1.

— реклама —

На прес-конференција во седиштето на РИК, Димитријевиќ изјави дека најголемиот дел од избирачките места биле затворени во 20 часот. Исклучок се местата каде што во моментот на затворањето имало граѓани кои чекале да гласаат, како и оние каде што во текот на денот гласањето било прекинато подолго од еден час.

— реклама —

Тој објасни дека пребројувањето на гласовите најпрво го вршат избирачките одбори, по што резултатите и записниците се доставуваат до локалните изборни комисии.

Оттаму, податоците се скенираат и се испраќаат до централата на РИК, каде што се внесуваат во системот и се проверуваат.

— реклама —

„Нема да се чека да бидат обработени сите избирачки места, туку резултатите ќе се објавуваат постепено, како што ќе пристигнуваат и ќе ја поминуваат проверката“, изјави Димитријевиќ.

Тоа значи дека првите бројки ќе бидат објавени пред да заврши целосното пребројување, а прелиминарните резултати ќе се ажурираат со пристигнувањето на новите податоци.