Првото обраќање на Трамп отвори повеќе дилеми отколку што понуди решенија

Би-Би-Си анализира дека првото јавно обраќање на американскиот претседател Доналд Трамп за војната против Иран оставило повеќе отворени прашања отколку конкретни одговори.

— реклама —

Британскиот јавен сервис посочува дека било невообичаено Трамп да чита однапред подготвен текст, што, според нив, укажува дека бил свесен за тежината на моментот и потребата да се држи до зададена рамка.

Во своето обраќање, Трамп ги наброја воените цели: уништување на иранските балистички ракети, разорување на иранската морнарица, спречување Иран да дојде до нуклеарно оружје и запирање на финансирањето тероризам. Но, како што нагласува Би-Би-Си, тој воопшто не спомнал промена на режимот, ниту го повторил претходниот повик до иранскиот народ да се крене против власта.

— реклама —

Претседателот изјавил дека првичните проценки биле оти војната би можела да трае четири до пет недели, но додал дека ќе трае колку што е потребно. Осврнувајќи се на медиумските шпекулации дека конфликтот би можел да му стане „здодевен“, Трамп рекол дека „во тоа нема ништо здодевно“.

— реклама —

Би-Би-Си забележува дека во салата се слушнала нервозна смеа кога Трамп накратко се оддалечил од темата, зборувајќи за завесите што ги избрал во својот прв мандат и за новата сала за свечености што се гради во Белата куќа.

Според анализата, обраќањето не понудило јасни насоки за политичката иднина на Иран по евентуалниот крај на војната. Особено се истакнува дека Трамп не објаснил какви се долгорочните цели на САД, ниту како Вашингтон би реагирал доколку конфликтот прерасне во поширока регионална војна.

— реклама —

Би-Би-Си заклучува дека комуникациската стратегија на Трамп претставува отстапување од досегашната практика, бидејќи американските претседатели во вакви ситуации традиционално ѝ се обраќале на нацијата со детално образложение за причините и целите на воените дејствија.