САД и Иран договориле рамка за продолжување на примирјето, се чека одлука од Трамп

Американски и ирански преговарачи постигнале рамка за продолжување на примирјето за дополнителни 60 дена, но конечната одлука сѐ уште зависи од американскиот претседател Доналд Трамп.

Според американски извори, на кои се повикува „Аксиос“, договорот треба да овозможи продолжување на прекинот на огнот и отворање простор за формални преговори за иранската нуклеарна програма.

— реклама —

Заменик-шефот на кабинетот на Белата куќа, Стивен Милер, изјави дека Техеран направил „значајни, суштински и драматични“ отстапки во разговорите за ставање крај на конфликтот.

„Претседателот Трамп сам ќе одлучи дали резултатите ги исполнуваат неговите стандарди“, рече Милер.

— реклама —

Американскиот потпретседател Џеј Ди Венс потврди дека разговорите напредуваат, но нагласи дека сѐ уште не е извесно дали Трамп ќе даде зелено светло за евентуалниот договор.

— реклама —

„Мислиме дека преговараат со добра волја и постигнуваме одреден напредок. Но тешко е да се каже дали и кога претседателот ќе потпише меморандум за разбирање“, изјави Венс.

Според „Аксиос“, најголемиот дел од условите биле усогласени до вторникот, но документот сѐ уште треба да добие политичка потврда од раководствата на двете држави.

— реклама —

Во меѓувреме, иранската агенција „Тасним“, која важи за блиска до Корпусот на исламската револуционерна гарда, објави дека не постои ниту финализиран ниту официјално потврден прелиминарен договор.

Додека дипломатските разговори продолжуваат, Израел дополнително ја зајакнува контролата врз Појасот Газа, а преговорите околу ограничувањата на иранската нуклеарна програма остануваат едно од главните отворени прашања.