Традиционалниот наратив на српската власт за „челично пријателство“ и „братски односи“ со Русија доби сериозен удар по изјавата на претседателката на Собранието на Србија, Ана Брнабиќ, која за „Политико“ изјави дека односите меѓу Белград и Москва не би ги нарекла братски.
Говорејќи на маргините на конференцијата ГЛОБСЕК во Прага, Брнабиќ порача дека Србија е „целосно усогласена“ со Европската Унија во вредностите и дека рускиот напад врз Украина е „чист чин на агресија“.
„Не би рекла баш дека тоа се братски односи. Нашиот претседател Вучиќ комуницира со Путин, но и лидери на некои земји членки на ЕУ имаат комуникација со неговата администрација“, изјави Брнабиќ.
Таа потсети дека Србија гласала за исклучување на Русија од Советот за човекови права на ОН и нагласи дека Белград го почитува територијалниот интегритет на Украина.
„Единствената причина зошто не воведовме санкции кон Русија е тоа што и самите бевме под санкции во 90-тите. Нашиот народ не сака санкции“, додаде таа.
Изјавата предизвика реакции и во Србија, а дипломатот Сречко Ѓукиќ оценува дека станува збор за официјален сигнал од врвот на власта, а не за личен став на Брнабиќ.
„Таа никогаш не би кажала нешто вакво ако тоа не е став што се разгледува во српското раководство. Не е тоа нејзина произволна изјава“, вели Ѓукиќ.
Според него, српската политика кон Русија „удрила во ѕид“, бидејќи Белград ги врзал своите клучни интереси за Москва.
„Србија практично ги стави сите свои интереси во една руска корпа. Русија тоа не го цени, туку го смета за природна должност на Србија“, вели Ѓукиќ.
Тој посочува и на проблемите околу НИС, оценувајќи дека за Србија тоа е стратешко прашање, додека за Русија станува збор само за „една од десетици рафинерии“.
Во текстот се потсетува и дека Александар Вучиќ во повеќе наврати зборуваше за „традиционално пријателство и братство“ меѓу Србите и Русите, додека Србија упорно одбива да воведе санкции кон Москва поради војната во Украина.
