Швајцарската полиција уапси 43-годишен маж осомничен дека пукал на рејв-забава во Арау, при што загина 22-годишна Италијанка, а уште пет лица беа повредени.
Инцидентот се случил во раните утрински часови во неделата, околу 2:30 часот, непосредно по завршувањето на техно-забавата „Aarau Rave VOL. 7“ на хиподромот „Шахен“. Загинатата е идентификувана како Марија Спинели.
Според сведоци, во прв момент присутните помислиле дека се работи за огномет, но настанала паника откако некој извикал да легнат на земја.
Еден од сведоците за швајцарскиот весник „Блик“ раскажал дека се обидел да ѝ помогне на жена која крварела од прострелна рана, но безуспешно. Полицијата подоцна потврдила дека таа починала на местото на настанот.
Пет други лица, четворица мажи и една жена на возраст од 24 до 27 години, биле пренесени во болница. Тие се здобиле со повреди со различна тежина, од полесни до тешки, а сите имаат живеалиште во Швајцарија.
По пукањето, полицијата започнала голема потрага, која резултирала со апсење на 43-годишен швајцарски државјанин.
„Во рамките на потрагата, во понеделникот, 31 август 2026 година, нешто пред еден часот наутро, приведен е 43-годишен швајцарски државјанин. Мажот потоа е уапсен поради сомнение дека го сторил кривичното дело“, соопшти полицијата.
Од полицијата засега претпоставуваат дека осомничениот дејствувал сам. Истрагата продолжува со цел да се утврдат точниот тек на настаните, мотивот и околностите што довеле до пукањето.
За трагедијата се огласи и италијанската премиерка Џорџа Мелони, која изрази сочувство до семејството на Марија Спинели и до повредените, меѓу кои има и двајца италијански државјани.
Хиподромот на кој се одржувала забавата го управува Тркачкиот клуб Аргау, кој изрази шок и сочувство до погодените и нивните семејства. Настап на забавата имал и швајцарскиот диџеј Текибо, кој порача дека настанот е „апсолутно потресен“.
На забавата, која се одржувала на наткриен хиподром, биле најавени околу 3.500 посетители. Арау е главен град на кантонот Аргау и се наоѓа околу 45 километри западно од Цирих.
