Директорот на руска компанија за развој на беспилотни летала денеска е хоспитализиран откако бил ранет во вооружен напад во градот Тула, јавуваат руските медиуми. Надлежните органи случајот го третираат како обид за убиство.
Според информациите, станува збор за Андреј Черезов, кој бил нападнат во зграда во Тула, град што се наоѓа на околу 190 километри јужно од Москва.
Рускиот портал „Маш“ објави дека напаѓачот го чекал Черезов на скалите од зградата, на четвртиот кат. Кога директорот се појавил, напаѓачот испукал три куршуми кон него.
Неговата сопруга ја слушнала пукотницата, ја отворила вратата и го пронашла Черезов ранет, по што веднаш повикала итна медицинска помош. Тој бил пренесен во болница, додека напаѓачот успеал да избега.
Полицијата започнала интензивна потрага по сторителот, а засега нема официјални информации за здравствената состојба на повредениот.
Компанијата со која раководи Черезов е основана во 2022 година и се занимава со научно-истражувачка работа и развој на беспилотни летала и други технологии во областа на природните и техничките науки.
Неодамна компанијата добила договори за испорака на беспилотни воздушни системи за Државниот технички универзитет во Воронеж за истражувачки цели. Според достапните информации, вредноста на двата договори изнесува околу 29,7 милиони рубљи и предвидува испорака на 337 комплети мултироторни дронови и 17 системи за управување.
