Рускиот претседател Владимир Путин сака да ја заврши војната во Украина до крајот на оваа година, но само под услови што Москва би ги сметала за победнички, објави Bloomberg, повикувајќи се на анонимен извор.
Според агенцијата, условите на Кремљ вклучуваат целосно заземање на Донбас и широк безбедносен договор со Европа, кој практично би ги признал руските територијални придобивки.
Во меѓувреме, портпаролот на Кремљ, Дмитриј Песков, ги негираше информациите дека Путин поставил конкретен рок за крај на војната.
Блумберг наведува дека украинските беспилотни летала нанесуваат значителни загуби на руските сили на фронтот и сè почесто погодуваат цели длабоко во руската територија, што дополнително го зголемува незадоволството во Русија.
Според извори на агенцијата, меѓу обичните Руси расте заморот од војната поради економските проблеми и ограничувањата на интернетот, а нервоза има и меѓу руската елита. Дел од високите функционери на Кремљ сметаат дека војната влегла во ќор-сокак и дека нема јасен пат кон решение.
Агенцијата истакнува дека масовната употреба на дронови од страна на Украина станала клучен фактор во војната.
Минатиот викенд украинските сили изведоа еден од најголемите напади со дронови врз Москва и московскиот регион од почетокот на инвазијата. Според Bloomberg, сè повеќе Руси директно го обвинуваат Путин дека војната ја донел до нивниот праг.
Неколку европски дипломати, кои сакале да останат анонимни, оцениле дека расположението во Русија е мрачно, додека украинските напади ја пренесуваат војната во самата руска престолнина.
Најџел Гулд-Дејвис од Меѓународниот институт за стратешки студии изјавил дека „Русија не успева на бојното поле“ и проценил дека Кремљ речиси сигурно ќе мора да спроведе нова делумна мобилизација во следните 12 месеци.
На 9 мај Москва ја одржа најкратката парада по повод Денот на победата во модерната руска историја. За првпат по многу години немало прикажување воена техника, туку видеоснимки од употреба на оружје. За време на парадата биле забележани и прекини на интернетот во центарот на Москва.
Во својот говор Путин повторно тврдеше дека Русија не војува само против Украина, туку против целиот НАТО.
По парадата тој изјави дека „работата е блиску до крај“, мислејќи на војната во Украина.
Сепак, аналитичарите од Institute for the Study of War оценија дека нема знаци оти Кремљ навистина е подготвен да ја прекине агресијата.
Тие посочуваат дека Москва и натаму инсистира Украина да ги повлече своите сили од Донбас како услов за трајно примирје.
Помошникот на Путин, Јуриј Ушаков, изјави дека дури и по десет рунди мировни преговори, војната ќе продолжи ако Киев не се повлече од Донбас.
Песков повторно порача дека Русија ќе ја продолжи, како што ја нарекува, „специјалната воена операција“ сè додека не бидат исполнети сите поставени цели.
