Претседателот на Украина, Володимир Зеленски, зборуваше за мировните преговори со Русија и му се обрати на лидерот на таа земја, Владимир Путин, со порака дека ќе го чека во Турција во четврток бидејќи, како што додаде, „веќе нема смисла да се продолжува со убиства“.
„Чекаме целосно и трајно примирје, почнувајќи од утре, со цел да се обезбеди потребната основа за дипломатија. Нема смисла да се продолжуваат убиствата. И ќе го чекам Путин во Турција во четврток. Лично. Се надевам дека Русите овој пат нема да бараат изговори“, напиша Володимир Зеленски на мрежата „Х“.
Да потсетиме дека американскиот претседател Доналд Трамп претходно објави примирје и го повика Зеленски да го прифати предлогот на Путин.
„Рускиот претседател Путин не сака да склучи договор за прекин на огнот со Украина, но сака да се сретне во Турција во четврток за да преговара за евентуален крај на крвопролевањето. Украина треба да се согласи со ова сега. Барем тој ќе може да утврди дали е можен договор, а ако не, европските лидери и САД ќе знаат каде стојат и ќе можат да дејствуваат соодветно! Почнувам да се сомневам дека Украина ќе постигне договор со Путин, кој е премногу зафатен со прославување на Денот на победата во Втората светска војна - војна која немаше да биде добиена (дури ни приближно!) без Соединетите Американски Држави. ОДРЖЕТЕ ГО ТОЈ СОСТАНОК, СЕГА!!!“, напиша Трамп.
Патем, Путин предложи одржување директни разговори со Украина, со цел постигнување траен мир и завршување на војната. Иницијативата беше поздравена од украинскиот претседател Володимир Зеленски, кој рече дека Киев е подготвен за разговори, но дека Москва прво мора да се согласи на итен прекин на огнот.
Советникот за надворешна политика на Кремљ, Јуриј Ушаков, им рече на новинарите по забелешките на Путин дека предложените разговори на Путин ќе го земат предвид и нацрт-договорот отфрлен во 2022 година и моменталната ситуација на терен.
Неколку дена по руската инвазија на Украина во февруари 2022 година, Русија и Украина започнаа преговори во Белорусија. Овие преговори подоцна продолжија во Истанбул. Нацртот договорен таму, кој ја постави рамката за можно решение на конфликтот, е познат како „Истанбулски договор“.
