Жителите на Загреб од утринава се соочуваат со прекини и отежнато функционирање на дел од јавните услуги, откако работниците во јавниот превоз и комуналните дејности започнаа штрајк.
До штрајкот дојде откако синдикатите и управите на компаниите не успеале да постигнат договор за новите колективни договори и зголемување на платите. Синдикалните организации предупредија дека прекинот на работата би можел да трае и неколку дена.
Граѓаните се известени да очекуваат значително подолго време за патување, а каде што има можност, да користат алтернативни начини на превоз.
Штрајкот не се однесува само на јавниот превоз, туку ги опфаќа и комуналните услуги. Особено се погодени собирањето отпад и одржувањето на јавните и зелените површини.
Градоначалникот на Загреб, Томислав Томашевиќ, вчера изјави дека синдикатите очигледно сакаат да организираат штрајк по секоја цена.
Синдикалните претставници го отфрлија тоа тврдење и го повикаа Томашевиќ да седне на разговор со нив, со цел да се најде решение и да се избегне продолжување на прекинот на работата.
