Едно лице загина, а двајца членови на екипажот се водат како исчезнати откако танкер бил погоден со проектил во близина на брегот на Оман, во нов инцидент што дополнително ги зголемува тензиите во регионот.
Танкерот „Сетебело“, кој плови под знамето на Палау, испратил повик за помош откако неговата машинска просторија била погодена додека се наоѓал во близина на градот Сохар, во Оманскиот Залив. По ударот избувнал пожар, а локалните власти веднаш започнале операција за евакуација на екипажот.
Британската компанија за поморска безбедност „Вангард Тек“ прва извести за инцидентот, а подоцна нападот го потврди и британската агенција за поморски трговски операции (UKMTO), која соопшти дека танкерот бил нападнат на околу 20 наутички милји североисточно од Сохар.
„Локалните власти известија дека избувнал пожар во машинската просторија на танкерот и помагаат во евакуацијата на екипажот. Бродот пријавил една жртва и двајца исчезнати членови на екипажот. Засега нема информации за загадување на животната средина“, наведоа од UKMTO.
Во моментов не е познато кој стои зад нападот.
Инцидентот се случува во период на сериозно влошена безбедносна состојба во близина на Ормускиот Теснец – еден од најважните светски поморски коридори низ кој вообичаено минува околу една петтина од глобалните испораки на нафта и течен природен гас.
Во последните месеци регионот беше погоден од низа напади врз трговски бродови, како и паралелни поморски блокади воведени од Иран и САД. И покрај тоа, Оман продолжува да има улога на посредник во дипломатските напори меѓу Техеран и Вашингтон.
