Рама по протестите во Тирана: Ова нема никаква врска со студентите, зад хаосот стојат туѓи агенти

Албанскиот премиер Еди Рама реагираше по протестот на студентите во Тирана, обвинувајќи дека зад насилните случувања стојат надворешни фактори и дека протестот се оддалечил од првичните барања на студентите.

— реклама —

Во јавното обраќање, во чија заднина се гледаше запален објект во центарот на Тирана, Рама оцени дека актуелните случувања не ги одразуваат вистинските проблеми и стремежи на студентите. Тој ги обвини организаторите дека ги вовлекуваат малолетниците во насилство, ги маскираат и ги поттикнуваат на уништување и судири со полицијата.

„Ова нема никаква врска со студентите, целиот овој оган не е студентски. Целото ова заложништво со маски нема никаква врска со грижите, проблемите и аспирациите на секој што сака да биде подобар“, изјави Рама.

— реклама —

Тој оцени дека зад случувањата стои истата сила што, според него, ја притиска албанската опозиција и предупреди дека постои опасност од нови обиди за дестабилизација на земјата.

— реклама —

Рама постави прашања за вклучувањето малолетници во протестите, обвинувајќи дека тие се поттикнуваат да носат маски, да откорнуваат тротоари и да ја напаѓаат полицијата, со што се загрозуваат нивните животи.

„Како може малолетници да се изнесуваат на улица? Како може малолетници да се поттикнуваат да ставаат маски, да ги откорнуваат тротоарите што секојдневно се одржуваат со вашите даноци и да ја напаѓаат полицијата? Како може да се загрозуваат животите на малолетниците со нивно изнесување на улица во интерес на туѓи агенти?“, праша албанскиот премиер.

Сепак, Рама призна дека студентите и граѓаните имаат право да бараат подобри услови и решенија за проблемите со кои се соочуваат.