Рама порача дека Владата нема да биде соборена со насилство и повика на прекин на нападите врз полицијата

Албанскиот премиер Еди Рама ги обвини организаторите на неодамнешните протести дека се обидуваат да предизвикаат дестабилизација на земјата и да го попречат нејзиниот пат кон членство во Европската Унија. Тој порача дека Владата нема да биде соборена со насилство и повика на прекин на нападите врз полицијата.

— реклама —

На средба со директори на средни училишта во Министерството за образование, посветена на учеството на малолетници во насилни инциденти, Рама оцени дека протестите не се поврзани со вистинските потреби на учениците, туку дека станува збор за организирани активности во рамките на, како што рече, хибридна војна поттикната и од странски фактори.

— реклама —

„Каменот во раката на некој што го фрла кон полицијата е оружје. Овој бран на насилство мора да запре“, изјави Рама. Тој ги отфрли обвинувањата за непропорционална употреба на сила и наведе дека во немирите биле повредени околу 200 полицајци и 80 демонстранти.

Албанскиот премиер упати критики и кон дел од медиумите, обвинувајќи ги дека намерно го претвораат незадоволството во гнев со цел да придонесат за соборување на Владата.

— реклама —

Рама рече дека е подготвен да разговара со секој што има политичка алтернатива, но нагласи дека насилството нема да доведе до промена на власта.

Осврнувајќи се на учеството на малолетници во немирите, тој најави можност за воведување построги мерки. Меѓу нив се финансиска одговорност на родителите за штетата што ќе ја предизвикаат нивните деца, можно намалување на старосната граница за кривична одговорност и ограничување на пристапот до социјалните мрежи за лица помлади од 16 години.