Рама повика на дијалог, студентите ги искршија поставените столчиња

Столчињата што албанскиот премиер Еди Рама утрово ги постави како повик за дијалог со студентите кои протестираат повторно беа искршени, и покрај неговиот обид да ги повика демонстрантите на разговор.

— реклама —

Рама повторно понуди средба откако претходниот ден дел од студентите ги оштетија столчињата и ја одбија поканата за разговор.

Албанскиот премиер порача дека правото на протест е неприкосновено, но нагласи дека уништувањето имот е кривично дело за кое следуваат законски и финансиски санкции.

— реклама —

Според Рама, незадоволството треба да биде поттик за дијалог, а не причина за продлабочување на тензиите и предизвикување инциденти. Тој истакна дека граѓаните имаат право да протестираат поради различни проблеми, но дека ниту едно незадоволство не го оправдува насилството.

— реклама —

Рама порача дека е подготвен за разговор и со оние кои имаат поинакви ставови од владата. Барањата за подобрување на состојбите, според него, треба да се решаваат преку институциите, со конкретни предлози и соодветно распределување на буџетските средства.

Тој упати апел до младите да се оградат од инцидентите и предупреди дека секој што ќе уништува јавен или приватен имот ќе мора да одговара за причинетата штета.

„Слободата на протестирање завршува таму каде што започнува слободата и безбедноста на другите граѓани“, порача Рама, повикувајќи на мирно изразување на незадоволството и решавање на проблемите преку дијалог.