Расте бројот на заболени од западнонилска треска во Италија: 432 заразени, 17 лица починаа

Бројот на случаи на западнонилска треска во Италија продолжува да расте, а само во последната недела се регистрирани уште 80 заразени. Од почетокот на годината до 26 август се потврдени вкупно 432 случаи, при што 17 лица починале, соопшти Италијанскиот институт за јавно здравје.

— реклама —

Од регистрираните случаи, кај 223 лица вирусот предизвикал невроинвазивна форма на заболувањето, при која е зафатен централниот нервен систем. Кај овие пациенти може да се појават сериозни состојби, меѓу кои менингитис и енцефалитис.

— реклама —

— реклама —

Смртноста меѓу потврдените случаи изнесува 7,2 отсто, што сепак претставува пониско ниво во споредба со истиот период минатата година.

Вирусот на Западен Нил најчесто се пренесува преку убод од заразен комарец. Кај најголем дел од заразените, заболувањето може да помине без симптоми или со блага клиничка слика, но кај помал број случаи може да доведе до сериозни невролошки компликации.