Најмалку 31 лице го загубило животот, а 93 се повредени во разорните поплави и свлечишта што го погодија Непал. Според тамошната полиција, како исчезнати се пријавени уште 384 лица.
Особено загрижува фактот што меѓу исчезнатите има 291 странски државјанин. Најголем број се државјани на Индија – 105 лица, а како исчезнати се водат и 37 индиски државјани кои не живеат во Индија.
Според досегашните податоци, исчезнати се и 17 државјани на Малезија, 12 британски државјани, четворица државјани на Јужна Африка, тројца Американци, како и по еден државјанин на Австралија и Холандија. За уште 111 лица сè уште не е утврдено која е нивната националност.
Ситуацијата е особено тешка и во близина на главниот копнен граничен премин меѓу Кина и Непал, каде што се активирало свлечиште во областа Ѓиронг, во Тибет. Поради невремето и одроните, прекинати се патиштата кон преминот од кинеската страна, како и комуникациските врски и снабдувањето со електрична енергија.
Во погодените подрачја продолжуваат операциите за пребарување и спасување, додека властите стравуваат дека бројот на жртвите би можел дополнително да се зголеми.
