Расте притисокот врз Инфантино: Фиго се приклучи на барањата за негова оставка

Претседателот на ФИФА, Џани Инфантино, се соочува со сè поголем притисок за оставка, откако и португалската фудбалска легенда Луиш Фиго јавно побара негово повлекување.

— реклама —

Инфантино пристигна во Мароко, каде што свика итен состанок со високи функционери на ФИФА, по објавувањето на контроверзниот план за продажба на удел во Светското првенство, чија вредност се проценува на 3,1 милијарди фунти.

Иако планот подоцна беше повлечен поради силните реакции, незадоволството во меѓувреме се прошири и во самата ФИФА.

— реклама —

Европската фудбалска унија (УЕФА) и Конфедерацијата на Северна, Средна Америка и Карибите (КОНКАКАФ) веќе побараа заминување на Инфантино, а од УЕФА официјално соопштија дека тој повеќе ја нема нивната доверба.

— реклама —

Притисокот дополнително се зголеми откако претседателот на Фудбалскиот сојуз на Јордан, принцот Али бин Ал Хусеин, го обвини Инфантино за уцена. Со тоа, Јордан стана првата азиска земја што јавно се спротивстави на актуелниот претседател на ФИФА.

Според пишувањата на британските медиуми, доколку сите членки на УЕФА и КОНКАКАФ го следат ставот на своите конфедерации, дури 91 национален фудбалски сојуз би можел да застане зад иницијативата за негова смена. За разрешување на претседателот на ФИФА е потребна поддршка од 106 од вкупно 211 членки.

Во меѓувреме, британскиот „Тајмс“ објави дека соработниците на Инфантино безуспешно се обиделе да обезбедат јавна поддршка од групата „FIFA Legends“, составена од поранешни фудбалски ѕвезди кои соработуваат со ФИФА на официјални настани и промотивни активности.