Од ВМРО-ДПМНЕ денеска реагираа на прес-конференцијата на пратеникот на СДСМ, Фатмир Битиќи, оценувајќи дека разликата меѓу двете партии во економските политики е „небо и земја“.
Од владејачката партија тврдат дека Владата предводена од Христијан Мицкоски во изминатите шест квартали обезбедила економски раст над 3 проценти, раст на платите близу 10 проценти, зголемување на бројот на нововработени и историски најниско ниво на невработеност.
Во реакцијата се наведува дека Владата паралелно го финансира развојот на економијата и ги сервисира старите долгови создадени во време на владите на СДС.
Според ВМРО-ДПМНЕ, минатата година била отплатена еврообврзница од 500 милиони евра, а оваа година за отплата е еврообврзница од 700 милиони евра, за која половина од обврската веќе била сервисирана.
Од партијата посочуваат дека од 2026 до 2031 година државата има обврска да сервисира околу 9 милијарди евра по основ на главнина и камати од стари долгови.
Во соопштението се наведува и дека од втората половина на 2024 година до првиот квартал од 2026 година биле обезбедени 1,2 милијарди евра исклучиво за сервисирање на еврообврзници земени од претходната власт.
Од ВМРО-ДПМНЕ тврдат и дека капиталните инвестиции се реализираат на историски високо ниво, за разлика од периодот кога, како што велат, СДС бил на власт.
Партијата обвини дека поради лошото менаџирање на државата од страна на СДС, Владата сега враќа 50 милиони евра на 156 компании по основ на мерката „солидарен данок“.
Во реакцијата се наведува и дека СДС во периодот од 2017 до 2024 година го зголемил јавниот долг за 4,78 милијарди евра, при просечен економски раст од 1,8 проценти, раст на платите од 5 проценти и инфлација од 14 проценти.
„Граѓаните на изборите ги казнија лошите економски политики на СДС“, се наведува во реакцијата на ВМРО-ДПМНЕ.
