По медиумскиот интерес и најавениот протест пред Уставниот суд закажан за денеска (28.04.2026), од Судот информираат дека во конкретниот предмет е поведена постапка врз основа на сомнеж за уставноста и законитоста на Колективниот договор за култура и на член 76-љ од Законот за културата.
Оттаму појаснуваат дека станува збор за втора фаза од постапката, во која допрва ќе се оценува уставноста и законитоста на оспорените одредби, а конечна одлука сè уште не е донесена.
Уставниот суд наведува дека со внимание ги следи реакциите во јавноста, како и загриженоста што ја изразуваат дел од претставниците на културната заедница, при што потсетува дека правото на јавно изразување и протест е загарантирана демократска вредност.
Во таа насока, Судот апелира до јавноста внимателно и објективно да ги следи информациите поврзани со предметот, со цел да се избегне погрешно толкување дека веќе е донесена одлука или дека постапката се однесува на вреднување на работата или статусот на уметниците и културните работници.
Од Уставниот суд нагласуваат дека постапуваат исклучиво во рамки на своите уставни надлежности и одлучуваат за уставно-правни прашања, односно за усогласеноста на правните акти со Уставот. Предмет на оценка, како што посочуваат, не се улогата, придонесот или примањата на културните работници.
Судот додава дека е важно да се прави јасна разлика меѓу уставно-судската контрола на прописите и статусот на културната заедница, при што почитта кон нивниот придонес во општеството останува неспорна.
