Речиси сите гласови преброени: Студентите водат пред Вучиќ со 571.879 гласа

Студентската листа „Студентите победуваат“ освоила 52,64 проценти од гласовите на предвремените парламентарни избори во Србија, покажуваат најновите прелиминарни резултати на Републичката изборна комисија (РИК), објавени утрово во 9:05 часот. Листата „Александар Вучиќ – Обединета Србија“ има 39,22 проценти, што претставува разлика од 13,42 процентни поени во корист на студентите.

Според податоците на РИК, обработени се 8.127 од вкупно 8.392 избирачки места, односно 96,84 проценти.

— реклама —

Студентската листа освоила 2.242.966 гласа, додека листата на Вучиќ има 1.671.087 гласа. Разликата меѓу двете водечки листи изнесува 571.879 гласа.

На третото место е листата на Ивица Дачиќ, „Фактор на стабилноста“, со 92.417 гласа или 2,17 проценти. Со ваквиот резултат Социјалистичката партија на Србија останува под изборниот праг од три проценти, што би значело дека нема да освои пратенички мандати доколку резултатот се потврди.

— реклама —

Следуваат листата на Српската коалиција „НАДА“ со 38.228 гласа или 0,90 проценти, Сојузот на војводинските Унгарци со 34.742 гласа или 0,82 проценти и Албанската коалиција со 27.663 гласа или 0,65 проценти.

— реклама —

Според објавените податоци, на досега обработените избирачки места гласале 4.263.464 избирачи, што претставува излезност од 68,81 процент во рамките на обработените избирачки места. Од гласачките ливчиња, 98,71 проценти се важечки, а 1,29 проценти се неважечки.

Најновите резултати потврдуваат убедлива предност на студентската листа, која уште синоќа прогласи победа, додека Александар Вучиќ го призна изборниот пораз.

Во споредба со пресекот на РИК од 23:20 часот синоќа, кога студентската листа имаше 45,42 проценти, а листата на Вучиќ 44,86 проценти, разликата значително се зголемила со обработката на дополнителните избирачки места.

До целосното пребројување остануваат уште 265 избирачки места, по што ќе следува утврдување на конечните резултати и распределбата на пратеничките мандати.