Осум пожари на отворен простор се регистрирани до 13 часот денеска, информира Центарот за управување со кризи. Од нив, еден пожар е активен, еден е ставен под контрола, а шест се целосно изгаснати.
Активен е пожарот во Општина Македонски Брод, во месноста Видуш, во близина на селото Драгов Дол. Зафатени се ниска вегетација, нискостеблеста шума и грмушки.
Под контрола е ставен пожарот на градската депонија во Општина Делчево.
Во текот на денот се изгаснати шест пожари. Во Општина Виница пожарот бил во селото Блатец, каде што горела ниска вегетација, додека во Штип било интервенирано во населбата Света Петка, исто така поради пожар на ниска вегетација.
Пожар на депонија бил регистриран во селото Горенци, Општина Центар Жупа, а во Општина Лозово горел отпад во близина на Филтерната станица за вода.
Интервенции имало и во кумановската населба Средорек, каде што горело ѓубре, како и во селото Милетино во Општина Брвеница, каде што бил регистриран шумски пожар.
