Рекордна излезност на изборите во Србија, опозицијата очекува добар резултат

Предвремените парламентарни избори во Србија завршија во 20 часот, а според досегашните податоци, излезноста би можела да биде највисока во последните речиси 30 години.

До 18 часот гласале 64,89 отсто од запишаните избирачи, објави изборната комисија. Според аналитичарите, високата излезност оди во прилог на опозицијата.

— реклама —

Александар Вучиќ доминираше на националната политичка сцена во изминатите 14 години, но по притисокот од уличните протести беше принуден да распише предвремени парламентарни избори.

Според проценките на агенцијата Ипсос и Центарот за слободни избори и демократија (ЦЕСИД), до 19 часот гласале 67,6 отсто од вкупно 6.450.523 избирачи. Изборниот ден го одбележаа и бројни неправилности и инциденти.

— реклама —

— реклама —

Досегашните податоци укажуваат дека излезноста би можела да биде највисока по парламентарните и претседателските избори во 2000 година, кога беше соборен Слободан Милошевиќ.

Се очекува главната трка да се води меѓу листата на владејачката Српска напредна странка (СНС), предводена од Вучиќ, и студентската листа „Студентите победуваат“.

Вучиќ, кој е носител на листата на СНС, по гласањето изјави дека ќе ги прифати изборните резултати, каква и да биде одлуката на граѓаните. Неговото обраќање од изборниот штаб на партијата е најавено по 22 часот.