Рекордни 42 степени во делови од Европа: Горештините создаваат хаос

Екстремен топлотен бран продолжува да ја зафаќа централна и источна Европа, при што во неколку земји се измерени рекордно високи температури. Сушата и горештините предизвикуваат сериозни проблеми во енергетскиот сектор, а истовремено значително се зголемува и опасноста од шумски пожари.

Според „Гардијан“, Словачка, Австрија и Унгарија бележат историски температурни рекорди. Словачката хидрометеоролошка служба соопшти дека во Долне Плахтинце биле измерени рекордни 42 Целзиусови степени.

— реклама —

Во Полска, поради исклучително нискиот водостој на реката Висла, властите привремено ги затворија термоелектраните „Козенице“ и „Поланец“, бидејќи немало доволно вода за ладење на постројките. Со тоа од електроенергетскиот систем биле исклучени околу 1,3 гигавати производствен капацитет.

Полскиот премиер Доналд Туск ги повика работодавачите да обезбедат климатизација и доволно ладна вода за вработените за време на екстремните горештини.

— реклама —

Во Германија, климатски активисти протестираа пред кабинетот на канцеларот, барајќи поголема заштита на населението од високите температури. Според најновите проценки на Институтот „Роберт Кох“, околу 11.900 лица починале како последица на горештините ова лето.

Во Унгарија, премиерот Петер Маѓар соопшти дека нуклеарната електрана „Пакш“, која привремено беше исклучена, повторно ќе биде ставена во функција. Иако нивото на Дунав се зголемило, тој предупреди дека и натаму ќе биде потребно рационално користење на електричната енергија.

— реклама —

Експертите предупредуваат дека долготрајните горештини и сушата, дополнително засилени од климатските промени, вршат огромен притисок врз населението, инфраструктурата и природата.

Воедно, екстремните температури ја исушија вегетацијата и го зголемија ризикот од пожари. Според Европскиот информативен систем за шумски пожари, од почетокот на годината во Европската Унија изгореле околу 500.000 хектари, најмногу во Шпанија и Франција, додека во Украина изгореле дополнителни 292.000 хектари.

— реклама —

Австрија во средата измери рекордни 41,2 Целзиусови степени, а обемот на пожарите веќе е повеќе од двојно поголем од досегашниот рекорд за овој период од годината. Во Чешка условите што придонесуваат за избувнување пожари биле за повеќе од 50 проценти полоши од вообичаено, а во Словачка за 32 проценти.

Според анализата на конзорциумот „World Weather Attribution“, климатските промени ги направиле минатомесечните екстремни горештини, суша и силни ветрови најмалку 20 пати поверојатни во Шпанија и двојно поверојатни во Франција.