Државниот завод за ревизија (ДЗР) изрази неповолно мислење за финансиските извештаи и за усогласеноста на работењето на Јавната здравствена установа Институт за јавно здравје на Република Северна Македонија за 2024 година.
Ревизијата била спроведена на сметката за средства од програмите за здравствена заштита, сопственото учество на осигурените лица во цената на здравствените услуги и други сопствени приходи.
„Изразивме неповолно мислење во однос на вистинитоста и објективноста на финансиските извештаи и за усогласеноста на финансиските трансакции со релевантната законска регулатива за 2024 година“, се наведува во извештајот на ДЗР.
Ревизорите констатирале повеќе слабости во работењето на институцијата, меѓу кои нецелосна евиденција за приемот и потрошувачката на медицински материјали, како и неевидентирање на приемот и потрошувачката на вакцини во деловните книги.
Дополнително, било утврдено дека пописот на побарувањата не е извршен во целост, а за побарувањата во вредност од над 18 милиони денари, постари од три години, не биле преземени активности за наплата.
Во извештајот се наведува и дека активностите предвидени со Националната годишна програма за јавно здравје за 2024 година не биле реализирани во целост, како и дека не се воспоставени сите законски предвидени регистри што се во надлежност на Институтот.
Ревизијата утврдила и слабости во дел од постапките за јавни набавки, неправилности поврзани со ангажирани лица по договор на дело, недоследности при издавање деловен простор под закуп, како и случаи на несоодветни исплати на плати и надоместоци.
Меѓу забелешките е наведено и дека дел од медицинската опрема не е ставена во употреба.
Од ДЗР потсетуваат дека и во претходна ревизија било изразено неповолно мислење за работењето на Институтот. При проверката на спроведувањето на препораките од претходниот извештај било утврдено дека дел од нив останале неспроведени или само делумно реализирани.
На извештајот забелешки доставиле поранешниот директор на Институтот, проф. д-р Шабан Мемети, како и актуелната в.д. директорка, научен соработник д-р Марија Андоновска. Од доставените забелешки, ревизорите прифатиле само една, додека останатите биле одбиени поради недостиг на дополнителни докази.
