Домашното производство добило 6,29 милијарди денари од кредитната линија за инвестиции

Вкупно 14,2 милијарди денари се повлечени за финансирање инвестиции и развој на приватни компании во Македонија преку кредитна линија од 250 милиони евра, покажува ревизијата на Државниот завод за ревизија. Најголем дел од средствата се насочени кон домашното производство, а значителни износи се вложени и во градежни објекти и современа опрема.

— реклама —

Ревизијата се однесува на одобрените кредити во периодот од јануари 2025 до февруари 2026 година. Државниот завод за ревизија утврдил дека управувањето и распределбата на средствата од Развојната банка на Македонија се во согласност со важечката законска рамка.

Кредитната линија се спроведува преку 12 комерцијални банки, а компаниите добиваат поволни услови за финансирање: кредити до 10 милиони евра, рок на отплата до 15 години, грејс-период до три години и фиксна каматна стапка од 1,95 проценти, без дополнителни надоместоци за одобрување и управување. Компаниите учествуваат со најмалку 20 проценти од вредноста на инвестицијата.

— реклама —

До февруари 2026 година биле одобрени 767 проекти во вкупна вредност од 14,26 милијарди денари. Малите претпријатија предничат според бројот на проекти со 455 одобрени инвестиции, додека најголем финансиски износ добиле големите компании, за кои се одобрени 4,72 милијарди денари.

— реклама —

Според распределбата по дејности, производството добило 6,29 милијарди денари, односно 44 проценти од вкупните средства. За трговијата биле одобрени 3,5 милијарди денари, за транспортот 1,45 милијарди, а за градежништвото околу 988 милиони денари.

Најголем дел од инвестициите биле насочени кон градежни објекти, за кои се искористени 6,62 милијарди денари, и современа опрема, со 5,48 милијарди денари. Дополнително, околу 1,6 милијарди денари биле наменети за премин кон обновливи извори на енергија, а 545 милиони денари за обновување на транспортни средства.

Инвестициската активност продолжила и во март и април 2026 година, кога биле одобрени средства за уште 15 проекти во вредност од околу 168 милиони денари.